طول عمري كنت زي أي بنت، بحلم بشعر صحي وجميل. كان شغفي بالعناية بالشعر والبشرة رحلة شخصية ابتدت من زمان، مليانة تجارب عشان ألاقي الحل اللي يناسبني خصوصا بعد مشكلة الدولار ووقف الاستيراد.
لكن للأسف، كنت دايماً بحس إن فيه حاجة ناقصة.
كنت محبطة لأن المنتجات المستوردة سعرها مبالغ فيه، وفي نفس الوقت كنت بخاف من المنتجات المحلية اللي كتير منها مكنش قد الثقة، وفيه مواد بتضر الشعر على المدى البعيد. وبصفتي صيدلانية، كنت بعرف أقرأ المكونات الى ورا العبوة، وأشوف المواد الكميائية الى بتوعد بالجمال المؤقت و بتخرب على المدى الطويل.
لما حصلت الأزمة الاقتصادية، إحباطي وصل للقمة. المنتجات اللي كنت بثق فيها اختفت، أو بقى سعرها خيالي. هنا تحديداً، قررت إني لازم ألاقي حل. مش بس ليا، لكن لكل بنت بتمر بنفس المعاناة
رجعت للمذاكرة من الصفر، زي ما كنت في الكلية، وبدأت رحلة طويلة من البحث والتجارب، عشان أقدر ألاقي تركيبة حقيقية من قلب الطبيعة.
الرحلة ما كانتش سهلة. كنت متخبطة بين خوف وحماس. خوف من إني أفشل، وحماس لإن المنتج ده ممكن يحل مشاكل كتير. لكن الشيء الوحيد اللي كنت متأكدة منه هو إن المنتج ده طبيعي 100%، ولو ما نفعش، مش هيضر أبداً. ولأن الصدق كان أهم حاجة عندي، طلبت من الناس اللي بتجرب المنتج إنهم يقولوا كل حاجة بصراحةمن غير مجاملات ، حتى العيوب قبل المميزات، عشان أقدر أصلحها.
المعاناة الأكبر كانت في إقناع الناس إن المنتج الطبيعي مش لازم يكون "لامع" أو ريحته "فواحة" زي المنتجات الكيماوية. كان لازم أشرح إن المكونات زي عشبة ذيل الحصان واللانولين (دهن الصوف ) ليها ريحة قوية لكن فوايدها تستاهل.
و أصعب اختبار كان لما لقيت ناس بتطلب مني المنتج تاني قبل ما أكون عملت حتى الستيكر أو صفحة البيع! كنت بصحى الصبح ألاقي رسايل على الواتس آب تطلب العبوة الكبيرة، ودي كانت أكتر لحظة عرفت فيها إن شغفي ده يستاهل، وإني لازم أكمل.
VeraCare مش مجرد منتجات، دي خلاصة رحلة إحباط وبحث وشغف. هي الحل اللي كنت بدور عليه لنفسي، وقررت أشاركه مع كل بنت بتواجه نفس المشكلة. ودلوقتي بقينا تيم شغالين بنبحث وبطور وبنتابع كل جديد عشان نوصل لأفضل تركيبة بأفضل مكونات تدى افضل نتيجة .
إحنا بنؤمن إنك جميلة زي ما أنتِ، وإنك مش محتاجة تداري عيب، إنتِ محتاجة بس تعالجي المشكلة. ده بالظبط اللي لمسته في البنات اللي كانوا بيجربوا منتجاتي. لقيتهم بيسيبوا المكواة والسيشوار، وبينزلوا بشعرهم الطبيعي الكيرلي الهيلثي، وهما واثقين في جمالهم. ودي كانت مكافأتي الحقيقية.
VeraCare هي وعد مني ليكِ بالصدق والشفافية. إنك هتلاقي في كل عبوة الثقة والأمان اللي بتحلمي بيهم، وإني هفضل معاكي دايماً، عشان توصلي لأجمل نسخة طبيعية منك
